Qolf oyunu
Qolf oyunu
Qolf təbiətdə xüsusi olaraq düzəldilmiş yaşıl sahədə qolf çubuqları və kiçik sərt topla oynanılan bir oyundur. Oyunun məqsədi, sahənin təyin olunmuş 18 parkurunu (çuxurunu) qolf topuna ən az vuruş edərək tamamlamaqdır. Qolf Qərb ölkələrində əsasən varlıların, aristokratların məşğul olduğu idman növü sayılır.
Qolfçu üçün vacib qaydalardan biri də qolf meydanına diqqət və hörmətlə yanaşmaqdır. Oyunçu vuruş əsnasında sahədə ziyan verdiyi yerləri təmir etməyi bacarmalıdır. Məsələn, çəmən qapaqlarını yerinə qoymaq, top izlərinizi təmir etmək və s. Qolfda hər çuxur xüsusi olaraq işarələnir, «tee» adı verilən başlanğıc parkur, «gren» adı verilən və içərisində ucu bayraqlı son parkur olur. Digər hər çuxurun adı və topun neçə vuruşda çuxura atılacağını təyin edən tərifi vardır. Məsələn, par 3, par 4, par 5 kimi. Yəni 3 vuruşda, 4 vuruşda və 5 vuruşda qolf topunun çuxura atılması. Bir parkurdaki oyunun tamamlanması üçün topun mütləq neçə vuruşda olursa-olsun çuxura atılması lazımdır. Çuxurun içində metal və ya plastikdən hazırlanmış çanaq olur. Çuxurun diametri 10,8 sm, dərinliyi isə 10 sm ətrafındadır.
Qolf dünyada xüsusilə də İngiltərə və ABŞ-da sürətlə inkişaf dövrü keçib. ABŞ-da 250 mindən çox qolf sahəsi və 35 milyondan çox qolfçu var. Bu idman növü Avropa ölkələrində də çox məşhurdur. Ümumiyyətlə qolfun ən məşhur olduğu ölkələrin başında İngiltərə, İspaniya, İsveç, Fransa və İtaliya dayanır. Dünyanın ən əhəmiyyətli qolf turnirləri 4 major turnir olaraq bilinər. Mövsüm adətən aprel ayında açılır. Qolf idmanıyla bağlı bir çox film də çəkilib. Bu filmlərin mövzusu qolf idmanından və qolfun əfsanəvi oyunçularının həyatından bəhs edir. Məsələn, dünya qolf tarixinin gəlmiş-keçmiş ən böyük həvəskar golfcusu olaraq qəbul edilən Bobbi Conesin həyatından bəhs edən film bütün həvəskar idmançılara tövsiyə edilən sənət əsəri sayılır. Mənbə: modern.az Müəllif: Adəm Qorxmaz
Bu idman növünü digər idman oyunlarından ayıran əsas xüsusiyyətlərdən biri bütün oyun sahələrinin bir-birindən fərqli olmasıdır. Dünyada bir-birinin eynisi olan heç bir qolf sahəsi yoxdur. Sahədə hər çuxurun uzunluğu bir-birindən fərqlidir. Qolf sahələrinin cəmi uzunluğu, normal olaraq 5400 metrlə 7000 metr arasında dəyişə bilər.
Qolfda iki əsas qayda var: oyunçuya və sahəyə hörmət. Bu prinsiplərə bağlı hərəkət edilməsi sayəsində qolf idmanı geniş yayılıb və çox sevilir. Qolf idmanı hazırda milyardlarla dolların yatırıldığı bir sahədir.
Qolfçuların bir-birinə çox yüksək səviyyədə hörmət etməsi xüsusi diqqət çəkir. Bir qolfcu vuruş hazırlığına başladıqdan ta vuruşu bitirənə qədər digər oyunçular qımıldanmamalı, hərəkətsiz və susqun vəziyyətdə dayanmalıdırlar. Vuruş hazırlığı golfcu çubuğunu çantasından çıxardığı andan başlayır. Ümumiyyətlə vuruşu etməzdən əvvəl hər oyunçunun yerinə yetirdiyi bir ritual var. Qolfçunun bütün diqqətini topa yönəltməsindən ibarət olan bu ritual təxminən 30-40 saniyə çəkir. Məhz bu müddət oyunçunun konsentrasiyası üçün çox əhəmiyyətlidir. Bu sırada ətrafdakı oyunçular ya da tamaşaçılar arasında danışanlar olsa, vuruşu edəcək qolfçu konsentrasiyasını itirə bilər. Vuruş edən qolfçunun arxasında və ya yanında onu narahat edəcək qədər yaxın məsafədə dayanmaq olmaz. Bir sözlə, qolfun ən əhəmiyyətli xüsusiyyəti peşəkarlığı önə çıxaran və əsrlərdir dəyişməyən etik qaydalarıdır.
Qolf oyunu ən az iki, ən çox dörd adam tərəfindən oynanılar. Oyun «tee-box» adı verilən yüngülcə yüksəldilmiş bir sahədən topa zərbə ilə başlayır. Daha sonra «putting green» adı verilən pata sahəsiylə çuxur sona çatır. Pata sahəsi çox keyfiyyətli çəmənlə qablı və davamlı qısa kəsilərək pata etməyə uyğun hala gətirilmiş, ortasında və ya kənarında bayraqla işarələnilmiş çuxura verilən addır.
Bu oyunun özünə xas qaydaları dünyada qolf nüfuzu olaraq müzakirəsiz qəbul edilən «ROYAL AND ANCIENT ST ANDREWS» quruluşudur. Bu quruluşun təyin etdiyi qaydalar dünyanın hər yerində qəbul edilib.
Dünyanın məşhur adamları arasında qolfa hobbi kimi baxanlar çoxdur. Məsələn, ABŞ-ın keçmiş prezidentləri ata və oğul Corc Buşlar boş vaxtlarında qolf oynamağı çox sevirlər.
