Baş Dövlət Xəzinədarlığı Azərbaycan Respublikası prezidentinin 4 oktyabr 1995-ci il tarixli Fərmanı ilə Azərbaycan Respublikasında dövlətə məxsus maliyyə ehtiyatlarının vahid mərkəzdən idarə edilməsini təmin etmək, bu vəsaitlərin daxil olması və xərclənməsi üçün daha çevik nəzarət mexanizmini yaratmaq,dövlət borclarının, zəmanətlərin və alınmış kreditlərin uçotunu yaxşılaşdırmaq və respublikada qiymətli kağızlar bazarının formalaşmasını sürətləndirmək məqsədi ilə yaradılmışdır. Baş Dövlət Xəzinədarlığı haqqında Azərbaycan Respublikası
Nazirlər Kabinetinin 6 noyabr 2000-ci il tarixli qərarına görə xəzinədarlığın vəzifə və funksiyaları aşağıdakılardır. Xəzinədarlığın vəzifələri: - dövlət büdcəsinin layihələrinin hazırlanması üçün müvafiq təkliflər verilməsi, büdcənin icrasına dair hesabat sənədlərinin hazırlanması və büdcənin icrasında iştirak edilməsi; - dövlət büdcəsinin icrası üzrə xəzinə əməliyyatlarının uçotu və hesabat işlərinin təşkilinə metodoloji rəhbərliyin həyata keçirilməsi; - dövlət büdcəsi vəsaitlərinin idarə edilməsini, o cümlədən mərkəzləşdirilmiş xərclər üzrə nəzərdə tutulmuş resurslardan istifadənin səmərəliliyinin təmin edilməsi məqsədi ilə maliyyə planlaşdırılmasının həyata keçirilməsi; - dövlət büdcəsində büdcə kəsirinin örtülməsi üçün nəzərdə tutulmuş maliyyələşmə mənbələrindən istifadə edilməsi və s. Xəzinədarlığın funksiyaları: - Baş Dövlət Xəzinədarlığının hesabları üzrə əməliyyatları həyata keçirir və onların uçotunu təşkil edir; - xəzinədarlığın cari hesabları ilə tranzit hesabları arasında hesablaşmaların həyata keçirilməsini Azərbaycan Respublikasının Milli Bankı ilə razılaşdırılmış qaydada tənzimləyir; - dövlət büdcəsi ilə digər büdcələrin qarşılıqlı əlaqələrinin nizamlanmasını və qarşılıqlı hesablaşmaları həyata keçirir, o cümlədən müvafiq ilin dövlət büdcəsinə riayət olunmaqla Azərbaycan Respublikası Nazirlər Kabinetinin müəyyən etdiyi qaydada və hədlərdə dövlət büdcəsindən ssuda (borc) verir. Xəzinədarlığın hüquqları aşağıdakılardır: · dövlət büdcəsinin icrası ilə əlaqədar olaraq yerli maliyyə orqanlarından və mərkəzləşdirilmiş xərclərdən maliyyələşən nazirlik, komitə, şirkət, baş idarə və idarələrdən hesabatların vaxtında təqdim edilməsini tələb etmək və onları icmallaşdırmaq; · mərkəzləşdirilmiş xərclərin icrasına cari nəzarətin həyata keçirilməsi, maliyyə planlaşdırılması və dövlət büdcəsindən xərclərin maliyyələşdirilməsi üçün nazirliklərdən zəruri sənədləri almaq; · büdcə təşkilatlarının xəzinə əməliyyatlarının aparılması məqsədi ilə özünün seçdiyi Agent-Banklarda tranzit hesabları açmaq; · ayrılmış büdcə vəsaitlərinin təyinatı üzrə xərclənməməsi aşkar olunduğu, habelə vəsaitlərin xərclənməsinə dair müvafiq hesabatlar təqdim edilmədiyi hallarda müvafiq büdcə təşkilatının rəhbərliyini xəbərdar etməklə, həmin təşkilatların maliyyələşdirilməsinin məhdudlaşdırılması üçün maliyyə nazirinə təkliflər vermək; · yerli maliyyə orqanlarında xəzinə işlərinin müvafiq qaydalara uyğun qurulmasına, büdcə vəsaitlərinin hərəkətinin xəzinə hesablarında düzgün əks etdirilməsinə, mövcud kredit resursu və büdcə limiti həddinin gözlənilməsi prinsipinə əməl edilməsinə operativ nəzarəti təmin etmək; · qanunvericiliklə müəyyən edilmiş qaydada, o cümlədən, hüquq-mühafizə və məhkəmə orqanlarının qərarlarına əsasən idarə, müəssisə və təşkilatlarda Maliyyə Nazirliyi tərəfindən aparılan təftiş və yoxlamalarda iştirak etmək, bu təşkilatların maliyyə-təsərrüfat fəaliyyətinin təhlilinə cəlb olunmaq. · bank hesabı açmaq və ya belə hesabdan istifadə etmək üçün dövlət büdcəsindən və Naxçıvan Muxtar Respublikasının büdcəsindən maliyyələşən təşkilatlara yazılı icazənin verilməsi, qanunvericiliklə müəyyən edilmiş hallarda və qaydada əvvələr verdiyi icazənin geri çağırılması.