Balqabaq deserti

Payız-qış aylarında faydalı bostan məhsulu olan balqabaq mətbəxin sevimlisinə çevrilir. Onun ağızda əriyib gedən dadı ilə bərabər tərkibi minerallarla zəngin olan bu tərəvəzin orqanizmimiz üçün faydaları da çoxdur. Bədənimiz üçün zəruri mis, kalsium, dəmir və s. mənbəyi oluğuna görə o həzm prosesində, sinir və ürək-damar xəstəliklərində hədsiz faydalı hesab edilir.

Balqabaqdan hazırlanan ənənəvi reseptlərdən əlavə bu tərəvəzdən şirniyyatlar da hazırlanır. Əgər balqabaq plovu və ya qutabı hazırlamağa zamanınız yoxdursa, onun dadını asanlıqla başa gələn desertdə dada bilərsiniz.

Tərkibi:
— 500 qr. balqabaq
— 250 qr. şəkər tozu
— 100 qr. qoz. 

Hazırlanması:
Balqabağı soyub doğrayın, üzərinə şəkər tozu əlavə edib bir gecə soyuducuda saxlayın. Əgər zamanınız azdırsa 3-4 saat da saxlaya bilərsiniz. Bu vaxt ərzində şəkər tozu əriyib islanacaq. Əvvəl balqabaqları bir az yumşalana qədər tavada bişirin.

Sonra soba qabına töküb 200 dərəcədə 15-20 dəqiqə bişirin. Hazır olduqda balqabaqları bir qaba boşaldıb soyumasını gözləyin. Süfrəyə verilməsi sizin təqdimat fantaziyanızdan asılıdır. Onları kiçik stəkanlara arasına qoz tokməklə də yeyə bilərsiniz.

Hazırladı/Foto: Müjgan Həsənli