Özbək Çörəyi (Patır Non)

Azərbaycanda olduğu kimi Özbəkistanda da Novruz bayramında ləziz yeməklərlə bol süfrələr açılır. Bu bayramda özbəklər mütləq süfrəyə müxtəlif duzlu bişintilər və şirniyyatlar qoyarlar. Ruzi-bərəkət simvolu olan özbək çörəyinin (patır non) bayram süfrəsində həmişə öz yeri olur. Patır non çörəyini əslində təndirdə bişirərlər, amma təndir olmayan yerdə soba da işə yarayır. Bu çörəyin müxtəlif reseptləri var. Bu gün hazırlayacağımız çörəyin xəmiri su ilə deyil südlə yoğrulur.

1 ədəd çörək üçün

Ərzaqlar:
1 stəkan (250 ml) ilıq süd
2 çay qaşığı toz-maya
1 çay qaşığı şəkər tozu
2 stəkan (300 qram) un
1 çay qaşığı duz
60 qram Westgold kərə yağı, əridilib soyudulmuş
1 yumurta
Güncüt və yaxud çörəkotu (qara zirə)

Hazırlama Qaydası:
Toz-mayanı və şəkər tozunu südə əlavə edib əriyənə qədər əlinizlə həll edin. 5 dəqiqəlik kənara qoyun.
Unu və duzu iri qaba qoyun. Üzərinə mayalı qarışığı, kərə yağını əlavə edib xəmir yoğurun.

Alınan xəmir bir qədər yumşaq olsa da ələ yapışmamalıdır. Un az gəlsə, bir az da əlavə edin.
Xəmirin üstünü sellofan və ya çay dəsmalıyla örtüb gəlməyi üçün 1 saat yarım kənara qoyun.

İri listin üstünə perqament kağızı sərin. Qabarmış xəmiri kündələdikdən sonra, üstünə əlinizlə basaraq genişləndirin. Alınan dairənin diametri 23 santimetr olmalıdır. Xəmiri listin üstünə qoyun. Çay dəsmalı ilə örtüb bir az qabarması üçün 20 dəqiqəlik kənara qoyun.
Sobanı 200Cdək qızdırın. Bir az qabarmış xəmirin ortasını yumruğunuzla oyun ki, kənarlara nisbətən çuxur forması alsın. Çəngəllə çuxurun içini bəzəyin (özbəklər həm çuxur həm  naxışı “çəkic” adlandırdıqları ucu iynəli bir alətlə edirlər).

Çörəyin səthinə yumurta çəkib, güncüt və yaxud çörəkotu səpin. Sobanın orta gözündə təxminən 25 dəqiqə və yaxud üstü qızaranadək bişirin.

Mənbə: azcookbook.com