Sənin çatışmazlığın | Orxan Bahadırsoy

Yarasa korluğumsan
görə bilmirəm səni.
Olduğun uzaqlardan
eşidirəm səsini.
 
Təpədən dırnağacan
o qədər narahatam,
ən yaxşı həkimlər də
dərdimi bilmir, adam.
 
Səs qısıq, sümük zəif,
gözlər düşdü çuxura...
Nə vərəmdir, nə taun,
nə yaradır, nə xora...
 
Əllərim buz dərdinə,
sinəm sancıya düşdü.
Nə qulaq ağrısıdı,
nə boğazdı, nə dişdi!
 
Nə ilik dərdidi bu,
nə də ki, qan azlığı...
Hamısından betərdi
sənin çatışmazlığın!
 
Ürək, böyrək çatışmaz,
köçürərlər uzağı.
Mən səni taleyimə 
necə köçürüm axı?